За да се заштитат потрошувачите, на ниво на Унијата се унифицирани минималните рокови под гаранција на производите. Како резултат на ова, сите потрошувачи, без оглед на тоа од која држава-членка ги имаат купено производите, имаат право на минимум 2-годишна гаранција на производите. Доколку дојде до каков било дефект или пропуст на производот во првите 6 месеци, тој мора да биде заменет на трошок на продавачот, односно се претпоставува дека секој дефект во овој период е знак за фабричка грешка. Од друга страна, во период до 2 години дефектот или пропустот ќе биде заменет само доколку потрошувачот покаже дека производот се користел на соодветен начин, односно дека дефектот не настанал по вина на потрошувачот.